Pignarûl

De Vichipedie, la enciclopedie libare dute in marilenghe.

	«Se il fum al va a soreli a mont, cjape il sac e va pal mont, se il fum invezit al va de bande di soreli jevât, cjape il sac e va al marcjât»

Un pignarûl

La tradizion dal Pignarûl, ven a stâi impiâ i fûcs par parâ vie lis maledizions, e je di origjine celtiche, leade probabilmentri al domandâ la protezion di Baleno, il diu dal fûc. Il Cristianisim al à conservât cheste tradizion che e je rivade fint tai dîs di vuê. In dut il Friûl, la sere dal 6 di Zenâr, o in chê dal 5 di Zenâr, a vegnin impiâts i Pignarûi, tassis di lens, fen, robe vecje e dut ce che si pues brusâ. In cualchi câs, parsore dal pignarûl e ven metude la figure di une femine, ispirade a la figure de befane, che però secont i studiôs e je une inovazion moderne, che cjape dentri altris tradizions talianis. Di dutis lis fiestis de tradizion dal Friûl, chê dai fûcs di Pasche Tafanie e je sigurementri la miôr conservade e la plui sintude a nivel popolâr inmò in dì di vuê. La tradizion dai fûcs grancj di Pifanie si piert tal scûr di etis lontanis, leade a ceremoniis antighis dal timp dal solstizi di Unvier, celebradis di ducj i popui da la Europe.

[cambie] Usancis

Secont i studiôs di etnografie il significât di cheste usance al è dal sigûr propiziatori: i antîcs, dant fûc al simbul de viere vegjetazion, a domandavin ai lôr dius pagans di no jessi bandonâts a la scuretât e les criùris dal Unvier. A domandavin che la primevere, e cun jê la vite, a traviers il risurî de nature e podès tornâ a confuartâ la esistence dai oms.

La preparazion dal Pignarûl e jere une incombence risiervade ai zovins, parcè che lôr a rapresentavin lis fuarcis dal rinovament de vite. Lis energjiis gnovis buinis di tornâ a meti in moviment il cors naturâl des stagjons, in aparince reiterât des fuarcis aviersis dal scûr e dal mâl. Valadì che i zovins a jerin la fuarce revenànt che e sarès buride fûr de cinise dal Pignarûl, cinise che di fat, e jere podaspò sparniçade pai cjamps come sconzûr. Ce che si veve di brusâ al jere ufiert di dute la comunitât, parvie che a jerin comuns ancje i efiets positîfs e i segns par strolegâ che si volevin rigjavâ. Par chestis resons al rituâl a cjapavin part ducj, parcè che il Pignarûl al profetave cuâl che al sarès stât il destin da la anade che e stave scomençant.

In etis daspò, cul slargjâsi dal cristianisim, al scomençà a cjapâ part a chest acjadiment ancje il predi dal paîs, a significâ il ricognossiment de Glesie di un rituâl sigurementri pagan tes sôs origjinis, ma masse lidrisât tes costumancis locâls par podêlu refudâ e aviersâ. Cussì il predi stes a voltis al impiave il tasson des cjanis di sorturc e di ramis di peç e baraçâr. Il Pignarûl, inmò vuê, si lu prepare plantant un pâl centrâl sicu chel che si dopre par fâ lis medis, dulà che atôr si intassin i rescj des coltivazions dal an passât e, a voltis, cualchi rame di geneu par fâ sclopetâ il fogaron.

Une volte impiât il fûc, dut intor si cjantave e ancje si balave, cun dut che a esistevin des improibizions al rivuart: un Concei dal setim secul, timorôs che si tornàs a dâ masse rilêf ai caratars pagans de usance, al veve improibît i fûcs di Pifanie e i bai atôr di lôr. Plui indenant, il Concei di Rouen, dal an 878, al tornà a ripeti (e cun maiôr severitât) la improibizion cuintri "i fûcs de lune gnove di Zenâr", ma al è di crodi che sul cuel di Cuie, e ta chei dai contors, a sedin stâts pôcs i agns dulà che no si domandà al fum dal Pignarûl cuâl che al sarès stât l'andament de gnove anade. Cundidì che lis radîs dal rituâl a jerin masse lidrisadis te memorie e tes convinzions di ognidun par podê rinunziâ a la tradizion.

[cambie] Vecjo Venerant

Cûi che al fâs lis previsions, il strolic, al è in diviers puescj il Vecjo Venerant, che al sarès une figure dongje chê dal druide, il sacerdot tradizionâl celtic. I vielis a scrutinavin, e lu fasin ore presint, il davuelzisi dal fûc, la sô fuarce e la direzion cjapade dal fum: di ducj chescj elements si podeve indivinâ cuâl che al sarès stât l'andament di une interie stagjon agricule, ancje se dispès i segns si pandevin incierts, senò contrârs tra di lôr. Dutcâs, se il fum al va a soreli a mont si dîs "cjape il sac e va pal mont", a significâ che al è di spietâsi une anade di miserie. A seconde di indulà che al va il fum, si pues fâ une prevision su cemût che al sarà l'an gnûf, ossei se si va, o mancul, incuintri a une anade che e promet ricolts bondants. Ma vuê la agriculture no rapresente plui un aspiet fondamentâl de economie dal Friûl, e inalore il "Pignarûl" al reste nome une manifestazion di folclôr, o miôr une ocasion mediatiche di doprâ come promozion dal turisim.

[cambie] I nons ator pal Friûl

Chel di Tarcint, cul non di "Pignarûl", al è il fûc rituâl plui innomenât. No pardut i fûcs dal dì de Pifanie a si clamin cul stes non, ancje se cheste peraule e je la plui doprade; par esempli inte basse a si clamin cabossa o fugarela; altris nons a son foghere, fogoron, panevin, baraca e casera. E ancjemò il fûc al cuiste nons difarents, di lûc a lûc, Fogaròn, Foghera, Fugarizze, Pan-e-vin, Medili, Boreòn, Mieli, Sèimo.

[cambie] I plui cognossûts

I pignarûi plui famôs dal Friûl e son:

• Il Pignarûl Grant di Tarcint tâl Cjscjelat
• Chei dai borcs di Paulâr (La Femenate)
• "Le fugarele di Orçan" [Orçan di Remanzas]
• La "Foghera tal Timent" di Perteade di Tisane